In use Versöhnungskark gifft dat nu een plattdüütsch Kring. Ingang bröcht het dat Hans-Peter Matthies. Ji kennt jüm all von de plattdüütsch Gottesdienste to Wiehnachten jümmers an den 2. Wiehnachtsdag in use Kark. In düsse Kring sitten Lüe tohoope, de an de plattdüütsch Spraak interessert sünd. För den Een sünd dat Erinnerungen an siene Kindheit, för den Anneren is dat wat, wat eem Sposs maakt. Wi hebt Lüe in usen Kring de snakt Hamburger of Lübsches Platt, annere snakt Hadelner, Meckelbörger of Stader Platt, ook Oostfreeskes Platt un Calenberger Platt könnt ji hören. In Nedersassen gifft dat nämlich bannig veel plattdüütsch Spraken.
De plattdüütsch Kring dröpt sick an jedeenen iersten Donnerstag in´n Maand um Klock soss in us Gemeentehus. Över wat wird snakt? Da vertellt een, wat he in de laatsten veer Wochen beleevt het, en annere lest wat vun de plattdüütsch Geschichten und mannichmal snakt wi ook over dat, wat jüstament vandaag passert is. In use Kring sünd am meehrsten tien Lüe tosamen. Wenn ji an de platt-ddüütsch Spraak interessert sünd: Ji sünd vun Harten inladen.